Меню

/1898-1977/. Сэлэнгэ аймгийн Баянгол сум. Улаанбаатар хотын 10 жилийн нэгдүгээр сургуульд багш байхдаа Гавьяат багш /1946-07-08. №48/. Эмэгтэй.
    Багаасаа дуу, хөгжим сонирхож, 1921 оны Ардын хувьсгалын дараахан Сүхбаатарын нэрэмжит клубийн хөгжмийн дугуйланд явж авьяас билгээ тэтгэжээ. 1926 онд Оюутны сургууль нээгдэхэд дуу, хөгжмийн багшаар орж сурган хүмүүжүүлэх ажлаа эхэлж, Улаанбаатар хотын багшийн сургууль, 1940-1960 онд нийслэлийн 10 жилийн нэгдүгээр сургуульд дуу, хөгжмийн багшаар, ерөөс боловсролын салбарт тасралтгүй 37 жил ажиллаад насны тэтгэвэрт гарсан байна. Д.Нацагдоржийн “Бүхий олон багачууд” /Пионерийн дуу/, Д.Цэвэгмидийн “Багшийн сургууль” шүлэгт ая зохиосон нь олон арван жил дуулагдаж, хүүхэд багачууд, багшийн сургуулийн сүлд дуу болж байлаа. Хөдөлмөрийн гавьяаны улаан тугийн одонгоор шагнагджээ.