Меню

/1934/. Увс аймгийн Цагаанхайрхан сум. “Тоншуул” сэтгүүлийн нарийн бичгийн дарга байхдаа Соёлын гавьяат зүтгэлтэн /1990-11-09. №26/.
    19 настай болтлоо орон нутагтаа мал маллаж байгаад ХЗЭ-ийн ажилтан болж, улмаар 1956 оноос “Үнэн” сонины Увс аймаг дахь сурвалжлагч, мөн сонины төв редакцид утга зохиолын ажилтан, нарийн бичгийн дарга, “Тоншуул” сэтгүүлийн нарийн бичгийн даргаар тасралтгүй ажиллаад насны тэтгэвэрт гарсан байна. Энэ хооронд 1960-аад оны эхний хагаст МУИС-ийн дэргэд нээгдсэн утга зохиолын оройн дээд сургуульд суралцаж төгсчээ. Манай улсын ганц шог хошин тогтмол хэвлэл “Тоншуул” сэтгүүлийн нийтлэлийн бодлогыг 20 гаруй жил барьж ажиллахдаа түүний агуулгыг гүнзгийрүүлж, хийц үзэмжийг сайжруулж, шог хошин бичлэгийн төрөл, хэлбэрийг олшруулж, нийгмийн амьдралд амь бөхтэй оршиж буй хурц асуудлуудыг зоригтой тавьж дэвшүүлсэн материал олныг нийтэлж уншигчдын дуртай хэвлэл болгожээ. Уран бүтээлээ 1950-иад оны сүүлчээс эхэлж үргэлжилсэн үгийн богино хэлбэрээр голлон бичиж “Бугын дуу”, “Шигшрээгийн ай”, “Залуу насны дууль”, “Урт өдөр”, “Хар хүнтэйгээ хамт уншаарай”, “Улаан сарнай”, “20000 бээрийн тэмдэглэл”, “Анчин нохой хойлог”, “Чулуун арслан” номууд хэвлүүлсэн байна. Хөдөлмөрийн гавьяаны улаан тугийн одон, “Алтан гадас” одон, медалиудаар шагнагджээ.