Меню

/1927-1998/. Говь-Алтай аймгийн Жаргалан сум. Дархан хотын Силикат тоосго, шохойн үйлдвэрийн дарга байхдаа Гавьяат барилгачин /1990-08-17. №193/.
    1954-1958 онд Улаанбаатарт Намын дээд сургуульд, 1962-1965 онд ЗХУ-д /хуучин нэрээр/ Коммунист намын дээд сургуульд суралцаж төгсчээ. 1944 онд хөдөлмөрийн гараагаа багийн худалдааны төлөөлөгч-агентаар эхэлж бичиг үсгийн багш, малын санитарч, 10 өрхийн ухуулагч, 1947-1954 онд баруун хязгаарт цэргийн отрядад, 1958-1959 онд Намын дээд сургуульд багш, 1959-1960 онд ХААДС-ийн намын хорооны нарийн бичгийн дарга, 1960-1962 онд Улаанбаатар хотын намын хорооны нарийн бичгийн дарга, 1965-1992 онд Дархан хотын царууц тоосго, шохойн үйлдвэрийн даргаар ажиллаад насны тэтгэвэрт гарчээ. Баруун хил хязгаарыг гоминданы цэрэг, хасгийн дээрэмчдээс хамгаалах тэмцэл тулгаралтад удаа дараа оролцож “Онц хилчин” болсон  ахмад дайчин байжээ. 1965 онд намын эсрэг Ц.Лоохууз нарын бүлэг гэгчид холбогдон шийтгүүлж, 1990 онд цагаатгагдсан байна. Түүний хариуцсан үйлдвэр VI. VII. VIII таван жилийн төлөвлөгөөг тогтмол давуулан биелүүлж 80 шахам сая төгрөгийн ашигтай ажилласан, 1972 оноос хойш бүтээгдэхүүний чанарын аттестатчиллаар силикат тоосго 8 удаа, шохой 3 удаа алтан медалийн болзол хангасан, уралдаанд улсад 6 удаа, салбарын болон Дархан хотын хэмжээнд 200 шахам удаа шалгарсан байна. 1990 онд МАХН-ын Онц их хуралд төлөөлөгчөөр оролцож, Намын Төв хорооны гишүүнээр сонгогдож, “Алтан гадас” одонгоор гурван удаа, Ардын хувьсгалын болон Зэвсэгт хүчний ойн медалиуд, Польш улсын гавьяаны алтан медалиар хоёр удаа шагнагджээ.