Меню

/1901-1976/. Дорноговь аймгийн Улаанбадрах сум. Өвөрхангай аймгийн Хархорины сангийн аж ахуйн барилгын техникч байхдаа Гавьяат барилгачин /1975-05-27. №114/.
    17 настайдаа нутгийнхаа Элсэн Цагаан-Овоогийн хийдэд жасын агуулахын жижиг байшинг барилцаж барилгачны ажлаа эхлэн орон нутагтаа, түүхий тоосго цохих, байшин барих, засварлах ажил хийж байгаад 1938 оноос Дорноговь аймгийн тусгай хэлтэст аж ахуй, санхүүгийн эрхлэгч байхдаа уг хэлтсийн конторын барилгыг бариулж, улмаар Сайншандын дунд сургуулийн барилгын даамлаар ажиллаж Дорноговь аймгийн барилгын үйлдвэрлэлийн эх суурийг тавьжээ. 1942 оны сүүлчээс Улсын төлөвлөгөөний газрын барилгын гүйцэтгэгч, барилга ангийн дарга, 1947-1949 онд Дорнод аймагт, 1950 оноос Өвөрхангай аймгийн Хужирт, Хархорин суманд барилгын мастер, техникчээр насны тэтгэвэрт гартлаа ажиллажээ. Орон нутгийг барилгажуулах үйлст ухамсарт амьдралаа зориулж 176 барилга объектыг хариуцан бариулж, 1755,7 мянган төгрөгийн хэмнэлт гаргаж, 400 хүнийг барилгын ажилд сургаж дадлагажуулсан байна. Хөдөлмөрийн гавьяаны улаан тугийн одон, “Алтан гадас” одонгоор тус бүр хоёр удаа, Засгийн газрын Хүндэт жуух бичгээр шагнагджээ.