Меню

/1938-2004/. Дундговь аймгийн Дэрэн сум. Гар бөмбөгийн спортын дасгалжуулагч, Дундговь аймгийн Сайнцагаан сумын “Эрдмийн далай” цогцолбор сургуулийн багш байхдаа Гавьяат дасгалжуулагч /1998-06-02. №74/.
    Улаанбаатарт УБДС-ийг 1961 онд төгсчээ. Монгол хэл, уран зохиолын багш, биеийн тамирын багш, дасгалжуулагч мэргэжилтэй. 1961 оноос Мандалговийн 10 жилийн дунд сургуульд багшаар хөдөлмөрийн гараагаа эхэлж насны тэтгэвэрт гартлаа тэндээ ажилласан байна. 1958 оноос гар бөмбөгийн спортоор хичээллэж МБАТ-ний I, II спартакиадын мөнгө, Хөдөөгийн залуучуудын спартакиадын алт, хүрэл, УАШТ-ий 2 хүрэл, МҮЭ-ийн спартакиадын 2 хүрэл медаль хүртэж, 1966 онд ЗХУ-ын Манжерок хотод болсон Монгол-Зөвлөлтийн залуучуудын анхдугаар их наадамд төлөөлөгчөөр оролцсон байна. Спортын мастер цолтой. 1963 оноос эхлэн сургуулийнхаа 14-18 насны өсвөр тамирчидтай ажиллаж дасгалжуулсан баг нь 1964-1968 онд Монголын пионер сурагчдын эхний гурван спартакиадын 2 мөнгө, нэг хүрэл, 1976 оноос өсвөр үеийн УАШТ-ий 2 алт, 3 мөнгө, 3 хүрэл медаль хүртэж, 1978 оноос МХЗЭ-ийн цомын төлөө тэмцээний 9 удаагийн аварга, 1998, 2000 оны насанд хүрсэн эмэгтэйчүүдийн УАШТ-ий хошой аварга болсны гадна 3 мөнгөн медаль хүртсэн байна. Шавь нараас нь спортын мастер 12, дэд мастер 6, бусад зэрэг цолтой тамирчин олон арав төржээ. Дундговийн гар бөмбөгчид улсын шилдэг баг тамирчид гэгддэг нь энэ багшийн гавьяа юм. “Алтан гадас” одон, Ардын хувьсгалын ойн хүндэт медалиудаар шагнагджээ.