Меню

/1916-1974/. Дорнод аймгийн Матад сум. УТТ-ын жүжигчин байхдаа МУГЖ /1956-11-12. №194/. Эмэгтэй.
    1939-1943 онд Улаанбаатар хотод гар үйлдвэрийн артельд ажилчин байжээ. 1943-1944 онд урлагийн сургуульд суралцаж төгсөөд Улсын төв театр, Улсын драмын  театрт нас эцэслэтлээ жүжигчнээр ажиллажээ. Анх “Цогийн идэр нас”-ын Аюушийн дүрийг бүтээж урлагийн гараагаа эхэлснээс хойш Ч.Ойдовын “Далан худалч”-ийн Пагма, Ш.Цэрэнгийн “Будамшуу”-гийн Пиглай, А.Корнейчукийн “Платон Кречет”-ийн Рахиповна, Гилийн “Строконецийн хөөрөгт цоорч”-ийн Кордулла, А.Островскийн “Аянга”-ын Кабанова, Дэн И-гийн “Буурал бүсгүй”-н Хуан Му, Л.Ванган, Ч.Чимид нарын “Сэрэлт”-ийн Бумаа, Ц.Зандраагийн “Шинэ жил”-ийн Долгор, Д.Гармаагийн “Морьтой ч болоосой”-гийн Ханд, Ч.Лодойдамбын “Энэ хүүхнүүд үү”-гийн Долгор, С.Удвал, Дожоодорж нарын “Хүргэн хүү”-гийн Санжид гэхчилэн тайз, дэлгэцийн олон дүрийг давтагдашгүй уран чадварлаг бүтээж үзэгчдийн сэтгэлд мөнхөрсөн байна. Тоглох явцад харилцаагаа хүнд сайн өгдөг, хүнээс ч хүлээж авах юмаа авч чаддаг, хэтрүүлэг, чимэглэлийг эгзгийг нь тааруулж үнэмшилтэй хийдэг, уран сэтгэмж, дүрийн баяжуулалт сайтай, дүрийнхээ сэтгэлийн гүнд орж чаддаг, шогч инээдмийн чадварлаг жүжигчин байжээ.