Аймгууд

/1908-1992/. Төв аймгийн Баянцогт сум. УТТ-ын жүжигчин байхдаа МУГЖ /1956-11-12. №194/.
    Багадаа эцэг, эхээс өнчирч, 14 настайдаа Нийслэл хүрээнд ирж морин тэргээр ус зөөгч хийж байгаад 1929 онд цэрэгт явж албаа хааж байхдаа бичиг үсэг сурч дайрагч онгоцны нисэгч болж Баянтүмэний нисэх хороонд 6 жил ажиллажээ. Цэргээс халагдаад Улаанбаатар хотод эд хэрэглэгчдийн хоршоонд ажиллаж байхдаа урлаг уран сайхны ажилд оролцох болж, 1940 оноос Улсын төв театрт жүжигчин болсон байна. Анх “Хэлгүй эхнэр” хэмээх жүжигт тоглосноос хойш Д.Намдагийн “Шарай голын гурван хаан”-ы Цэнгэл, Д.Нацагдоржийн “Учиртай гурван толгой”-н Балган, Ч.Ойдовын “Далан худалч”-ийн Далай, Л.Ванган, Дашням нарын “Тожоо жолооч”-ийн Төмөр, Ч.Лодойдамба, Д.Сэнгээ нарын “Өөрийн замаар”-ын Шагдар, Н.Погодины “Кремлийн цаг”-ийн Забелин, “Буутай хүн”-ий Щадрин, Ш.Цэрэнгийн “Тангараг”-ийн Сүгсээ зэрэг 90 гаруй жүжгийн, “Цогт тайж”, “Гэм нь урдаа”, “Элбэг дээл”, “Үүрээр”, “Өглөө”, “Талын цуурай”, “Хоньчин Найдан”, “Нар хиртсэн жил”, “Хатанбаатар Магсаржав”, “Ирж яваа цаг”, “Намар нахиалсан мод”, “Үүр цайхын өмнө”, “Мандах нарны туяа” гэхчилэн 50 илүү кинонд тоглосон байна. Ухаан, инээдэм хоёрыг чадамгай хослуулдаг, аливаа жүжгийн холбоос болсон жижиг дүрийг урлан босгохдоо гаргууд жүжигчин байжээ.